عايزه اتعلم السواقه

اه فيها ايه يعني؟

عايزه اتعلم السواقه عشان لما اتعلمها اجيب عربيه بالقسط

ومايبقاش جوزي متحكم فى مواعيدي فى شغلي ولا استحمل غلاسه سواق تاكسي لحد مايوصلني للبيت

مهو انا مش هستنى كل شويه جوزي يمن عليا ويصحى ويقعد على رواقه يفطر ويشرب الشاي وبعدين يفتكر ان فى واحده واقفه بتغلي مستنياه يخلص عشان يوصلها الشغل بدري قبل المدير مايديها كلمتين فى عضمها على الصبح

وياسلام بقى لو هو عايز يروح شغله متارخ ولا اصلا يوم اجازه عنده ومش رايح الشغل

يبقى هاين عليه يقولى صحى حد من الجيران يوصلك وسيبيني انام

وهو السواقه عيب ولا حرام يا جدعان ؟

بس مين بقى اللى هيعلمنى ؟ جوزي؟

ده اسهله يرمي نفسه بالعربيه فى البحر ولا يعلمنى طبعا

مهو عايز يثبت لنفسه انه احسن مني فى كل حاجه وان مافيش ست بتعرف تسوق

بس برده عايزة اتعلم السواقه

نسيت يعنى ايه سلامه نية

اسوا حاجه اكتسبتها فى الشغل ده انى نسيت يعنى ايه حد يتعامل معاك بسلامه نية 

او ان حد يكون كلامه صريح وواضح 

او ان يكون اللى فى قلبه على لسانه

نسيت كمان ان فى ناس بتحب بعضها لله فى لله 

وانها مش عايزة اى مقابل او مصلحه فى معرفتها بيك

او انها تعيش محسنة الظن فيك 

نسيت يعنى ايه ناس بتتعب عشان تسعدك او لمجرد انها تشوفك وتسلم عليك قبل ماتمشي 

ياه هو لسه فى ناس كده فعلا 

لسه فى ناس بتحبك وبتوحشها ونفسها تشوفك قبل ماتسافر وتبعد تانى وفعلا تفرق معاها قوي 

كنت بعيده عن الناس دى لما اتجوزت وبعدين لما اشتغلت بعدت اكتر 

بقى حتى كلامي معاهم فى التليفون من باب الواجب والمجاملة وساعات تقيل على قلبي 

لكن من ناحيتهم لسه بيحبونى وفاكريني على طول

زعلت من نفسي قوي انى فى البعد نسيت قد ايه انا كانت روحي حلوة وكنت بعمل حاجات وماستناش مقابل وكانت كل نيتي خير 

زعلت قوي من البشر اللى معايا فى الشغل اللى مابقتش عارفه مين فيهم الكويس ومين فيهم الوحش ومين فيهم اللى يستاهل انى افتكره ومين فيهم اللى ممكن اخسر صداقته وانا مش واخده بالى بافتراضي سوء نية اللى قدامي 

وزعلت انى مش عارفه اتعامل معاهم بنفس الروح اللى كنت بتعامل بيها مع اهلى وناسي وقد ايه احنا فى الشغل بنخسر كتير بسبب سوء العلاقات او فتور العلاقات بين الموظفين 

لكن رجعت الشغل وانا فى دماغي الحديث عن الرسول صلى الله عليه وسلم 

"تبسمك فى وجه اخيك صدقه "

وقررت اعمل بيه وانى مش هسيء الظن بحد تانى ومش هستنى مقابل لاى حاجه بعملها

كمان مش هسال نفسي السؤال اللى بيهد عزيمه الواحد فى عمل الخير 

"هو مين فينا اللى مفروض يبدا بالسلام او الخير"

مش مهم المهم ان لو فى حاجه كويسه عايزة اعملها هعملها 

ومش هشيل جوايا من حد 

كل ده هيرجع عليا انا فى الاخر بحاله نفسيه كويسه وهحس انى مرتاحه وبالى مرتاح وضميري هادي 

بعد كام مشكلة حصلت بسبب انى ماكبرتش دماغي وافترضت سوء نيه اللى قدامي ومالتمستش الاعذار لحد

وماستفتدش اى حاجه بعد كده بالعكس انا حاسه بتانيب ضمير لحد دلوقتى 

ولا انتو ايه رايكم ؟

:)

المدير هيمشي ...ياترى ايه اللى جاى ؟

معرفتش اجيبلكم من الاول للاخر 

يعنى الحمد لله النسيان نعمة كبيرة 

ماعرفتش احكيلكم ايه الاول 

لكن اخترت اكتر حاجة شاغلانى وماثرة فيا 

مديري هيمشي من المؤسسة 

هيتنقل فرع تانى فى محافظة تانية 

بالسهولة دى وبالسرعة دى ؟

اه عادي مش بلد وسايط ليه مايعملش اللى هو عايزه 

مانكرش الخبر ده خلاني مش على بعضي 

مابقتش عارفة ارد عليه اقول ايه 

هيمشي من المؤسسة ؟ 

طيب ده انا كل شغلي معاه !

طيب مين اللى هييجى مكانه!

ياترى هيحتاج لخدماتى ولا هينقلونى قسم تانى ولا هيجيب مين مكانى ويستغنو عن خدماتي ؟

مانا ماليش حد ولا ليا فى النفاق ولا فى التهريج ولا ليا علاقات بحد فى الشغل برة المؤسسة 

الرزق بيد الله طبعا 

بس ده شغلي ده مجهودي ده تفكيري

!!!!!!!!!!!!!!!!!

مش مستوعبة اللى هيحصل 

كلها كام شهر وهيمشي لا ومستعجل على النقل كمان 

وجاى يقولى اتوافق على نقلى ومبسوط

ربنا يوفقه

انا دايما بتعلق بالمكان والناس 

لكن عمرى ماظهرت لحد اى مشاعر او اتكلمت

خصوصا لو حد مش مسموح يكون بينا اى مشاعر 

ومش هنضحك على بعض ونقول مشاعر اخوية وصداقة لانها بتفتح ابواب كتير مالهاش لازمة

:)

لكن فعلا زعلت 

كان انسان محترم وخفيف وعارف حدوده ومقدر لظروف الناس 

وقلقت على شغلي وفكرت كتير اتكلم معاه لكن الخوف انى اتفهم غلط بيسكتنى 

لو كان المدير ست كانت تبقى اهون كتير 

فى الاخر ادعولى ربنا يقدرلى الخير هو الاعلم فين الخير واعلم باللى جاى

مساء الروقان

مساء الفل عليكم كلكم 

طبعا هتقولو واخدة اجازة ورايقة وفايقة وراجعالنا بنشاط

الحقيقة بقى انى كنت بضحك على نفسي بكلمة واخدة اجازة دى 

اه صحيح لا فى صحيان بدرى عشان الشغل ولا حد بيتامر عليا باوامر ممكن تخلص فى دقيقة 

لكن برضه ارهاق كبير فى شغل البيت والزيارات ورغي الستات 

ورورورورورور لوك لوك لوك لوك لوك ورورورورورورور

مابيرحموش نفسهم ابدا ويقعدو ساكتين شوية 

وكان من حسن الاستضافة والترحيب الرغي الكتير 

ده حتى اللقمة ماعرفتش اتهنى بيها من كتر الرغي 

مااااااااااااااااااا علينا 

رجعت اهو يمكن شوية كده على مارجع اعلق عندكم 

لكن بجد الاستفادة الكبرى بالاجازة دى انى عرفت ليه الناس فى الشغل مستغنيين عن بعض ومش محتاجين حاجه من الشغل غير فلوسه 

لان ليهم حياتهم برة الشغل فى وسط اهاليهم وعيلتهم وبيتهم مش محتاجين حد زيادة يتدخل فى خصوصياتهم 

انا ماكنتش واخدة بالى من الموضوع ده وخدت الشغل على انه فرصه جديدة للتعارف على الناس وكسب ودهم والتقريب مابينا خصوصا انى ساكنة فى محافظة بعيدة عن اهلى ومابروحش غير كل فين وفين 

لكن بجد بعد ما قعدت فى وسط اهلى وبعدت عن الشغل ودوشته حسيت قد ايه الفرق بين انك تقعد فى وسط عيلتك واهلك وبين انك تقعد فى وسط ناس اغراب 

وحسيت كمان ان كل مشاكل الشغل والزعل اللى زعلته قبل كده كان مالوش اى معنى ولا لازمة وانى ماليش اى اهمية عند اى حد بنفس الدرجة اللى حسيت بيها ان ماحدش فى الشغل ولا فى المؤسسة له قيمة او اهمية عندى 

انا لسه مانزلتش الشغل 

هنزل قريب ان شاء الله 

واكيد تعاملى مع الناس هيتغير 

وكلمة ياستى مشى حالك وكبرى مخك وارمي ورا ضهرك اللى ماكنتش مستوعباها  رغم انكم قلتوهالى كتير

الكلام ده اكيد هيتطبق 

انتظرونى فى الجزء التانى ان شاء الله عشان احكيلكم شوية من اللى فات عشان نبدا الجديد على ميا بيضا 

:)

اجازة وراجعالكم ان شاء الله

يعتبر جالى اكتئاب

وكمان دخل علينا رمضان

اول رمضان مع الشغل

زى التور فى الساقية

ارهقت جدا وماكانش فى وقت ادخل حتى اسلم عليكم

كمان منصب السكرتيرة اتغير بقى شؤون ادارية رغم انى لسه على نفس المكتب

والمدير سافر فترة واتغيرت حاجات كتير معايا

يعنى من الاخر انتظرو سلسلة من الايام الغريبة جدا اللى انا نفسي استغربتها

بس هستازن منكم هاخد اجازة شوية كده ييجى شهر كمان على مافوق من الدوامة اللى دخلتها و ازور الناس اللى ماشفتهاش من ساعه ماشتغلت

خدلك اجازة وريح بالك

ماكانش ينفع ارجع بسرعه

ماكانش ينفع ارجعلكم بسرعه لما قررت انى اهتم بنفسي 

كنت بقويها واشجعها وارجعلها كرامتها 

كنت بحافظ عليها من الناس 

وكنت برسم حدود جديده فى معاملتى للناس 

ماكانش ينفع ارجع اقولكم انى بتغير او بتحسن او برجع لورا 

كنت عايزه ارجع اقولكم انى حققت اللى كنت بخططله 

والحمد لله حققته بنسبه كبيرة 

وفى ايجابيات كتير حصلتلى باهتمامى بنفسي ومصالحتى ليها 

رغم انى يمكن اكون اتكشف قدامى حقايق كتير لانى بطلت اتعامل بسزاجه او بعفويه او بتسامح اهبل 

ويمكن كمان فى بعض البشر اللى بعدت عنهم لاكتشافي انهم اصلا كانو بعاد عنى وانا اللى بقربلهم 

لكن الاهم من اى خسائر حصلت 

انى كسبت نفسي ومازلت بحاول اقومها وانميها واحافظ عليها واحبها واحترمها اكتر من الاول عشان بعد كده اقدر اتعامل مع اللى قدامي بشكل افضل 

الاهم انى برضه عرفت مين فيكم مهتم يقرالى 

وانا مش هدور على كم التعليقات قد ماهدور على قيمتها 

عشان كده مش هعلق عند اى حد غير اللى احس ان كلامه ليه معنى وفايده ليا وزودنى حاجه مااخدش من وقتى على الفاضي 

الاحساس بالامان

صعب قوي قوى لما تفتقد الاحساس بالامان 

فى شغلك 

فى بيتك 

فى شارعك 

لالالالالا 

مابتكلمش عن الامان والامن من الحراميه والحوادث 

لكن الامان من غدر الزمن ومن تقلب الاحوال 

صعب قوي تعيش حاسس انك  مش هتقدر تكمل فى شغلك  من غير شخص معين

او مش هتقدر تكمل حياتك من غيره

لكن فجاه تحس انك تقدر وانك اقوى مما تخيلت او اقنعت نفسك لمده طويله بانك ماتقدرش تعيش لنفسك 

او تعتمد على نفسك 

لما تحس انك مسؤول والاخرين بيعتمدو عليك 

وان شغلك فى ناس كتير معتمده عليه وبتطلبه منك انت مش حد غيرك 

لما تحس ان نفسك ليها قيمه ومعنى بعد سنين من انكار الذات واالتفكير فى الغير

لما تلاقى الناس بتطلب منك انك تثق فى نفسك وتعتمد على نفسك

وانك ماتنتظرش رد او شكر او اهتمام لانك عارف ان اللى عملته واضح والشمس مابنقولهاش منورة يا شمس 
 

ياااااااااااااااااااه  بعد كل السنين دى 

نسيتك يا نفسي يللى كنتى بتحسسيني بالامان سنين طويله

الحمد لله

الحمد لله 

اتحسنت الصحه بنسبه كبيرة 

واكتشفت ان الفترة اللى عدت دى كانت فترة قليله 

بس بالنسبالي كانت فترة طوووووووووووويلة قوى 

وطالعه منها بدور على حاجه مش عارفه هى ايه 

لان الفترة دى مع التعب  عدت عليا كام مشكلة فى البيت وفى الشغل 

بس حسيت انها اثرت فيا اكتر ما كانت ممكن تاثر فيا وانا بصحتى

ويمكن مع التعب كانت دماغي بتفكر اكتر مالساني بيتكلم

ونفسي احقق اللى نويت عليه 

وماعرفش انا هفضل على نفس القدره دى ولا هييجى وقت وارجع زى ماكنت

صابتنى العين ورب العرش نجانى

سلام عليكم

قبل اى شىء

  شكر خاص جدا جدا جدا للمدون الشقيق الاحلام لسؤالك الدائم وخوفك وقلقك  

وبعتزرلك جدا عن عدم الرد على اى تعليق فى الفترة اللى فاتت

ويمكن الفترة الجاية كمان

انا ماكنتش قلت انى بمر بوعكة صحية الا للاحلام

ولكن نظرا لطول غيابي عن المدونة

فانا بعتزر عن عدم الظهور

وده لانى بمر بوعكة صحية تترواح من خفيفة الى معتدلة الى عنيفة من وقت للتانى ومش عارفة اقعد اكتب اى حاجه

لانى الفيوزات ضربت والاسلاك ساحت وكل شوية تحصل قفلة

وبروح الشغل بالعافية

دعواتكم لى بالشفاء العاجل

:)

استاذ سقيل ..ارحمنى من خلقه جنابك يومين

فيه كم من السقاله والرخامة والاستظراف وتقل الدم 

ده غير البجاحه و العين المفتحه والمكر اللى بيطلع منهم 

بصو ماحدش يقولى انتى بتبصيله ليه 

هقولكم 

انا مش من عوايدي انى ابص فى وش حد اصلا من الصنف الرخم .قصدى الصنف الخشن  اللى هو الرجاله 

لكن ده لفت نظرى من اول يوم دخلت مكتبى 

بصات غريييبه وقلاطه غير طبيعيه 

وقلت عادى واحد وبيكرهنى لله فى لله

مش مشكلة يومين وهيرتاح 

لكن لما الموضوع يتكرر كل يوم بشكل مستفز 

كان لازم اعرف ده سره ايه الراجل  ده 

اكونش قتلت ابنه وانا معرفش؟

اتارى بقى 

انه كده مع كل الستات المحترمه 

وان اللى ماتعبروش وماتقعش فى دباديبه من اول نظره بيقلب على وشه التانى ويعاقبها بنظراته الشبيهة بنظرات دراكولا فى فيلم اسماعيل يس

ده غير قلة الزوق اللى بينقط من دراعه وهو ماشي 

طبعا بعد ماعرفت الكلام ده من ناس صادقه مش بتوع تاليف يعنى 

قلت بس كده ارتحت 

طلعت عبيطه كالعاده وفاكره انه متضايق من وجودى فى الشغل او انى خدت مكان حد قريبه ولا حاجه

وطبقت المثل اللى بيقول  الباب اللى يجليك منه استاذ سقيل اقفله وانت تقيل

على فكرة استاذ سقيل فيه منه برضه كام واحد كده 

بس ده يمكن لانه مدير ففاكر نفسه ماجبتوش ولادة 

بس الله يخليك ارحمنى من خلقة جنابك يومين

ايوة ..لا ...ايوة ايوة ..لالالالالالا

معلش اتاخرت عليكم 

فات اسبوع يمكن ولا حس ولا خبر ولا رد على تعليق واحد من تعليقاتكم 

طيب تعالو احكيلكم اللى حصل 

صباح الخير يا فتحى (جووووووووزي ) هتفطر ولا هتروح الشغل على طول ؟

لا هفطر بس بسرعه قوام 

ماتخافش هعملك انت سندوتشات بسرعه  انا ماليش نفس افطر  ...انا مش عارفه مالي كده دايخه ليه على الصبح 

مهو لو انتى بتاكلى هتبقى كويسه 

يمكن 

:

:

:
ازيكم يا حلوين ..جايبين فى سيرة مين النهارده ؟..اقصد عاملين ايه النهارده ؟

اسكتى يا فوزيه (انا ..انا ) مش مدام فاطمة طلعت حامل 

حامل :) يا سلااااااااااام ...ايه الخبر الحلو ده 

اليوم التانى 

صباح الخير يا فتحى .يللا انا عملتلك الفطار

 ايه برضه مش هتفطري ؟.

لا والله مش قادره ...عندي غممان نفس كده مش طايقه الاكل 

مانا قلتلك ..خليكي كده لحد ما تختفي ..انتى بقيتى بتشتغلى يا هانم يعنى لازم تفطري كويس

يووه يا فتحى ..والله مانت عارف حاجه 

:

:

:

صباح الخير يا حلوين ..عرفتو ان مدام فاطمه طلعت حامل ؟

ماحنا اللى قلنالك امبارح ..وهنقولك خبر جديد كمان النهارده 

خييييييييييييير ؟

مدام اميرة كمان حامل 

بجد ؟ *_* دى موضه بقى ...(ماتحصليش انا كمان تبقى خير وبركه) الف مبروك

اليوم الرابع 

انا النهارده يا فتحى تعبااااااانه ودايخه وماكنتش قادره اشتغل خالص 

طيب 

هو ايه اللى طيب ..بقولك تعبانه ودايخه وحاسه انى نفسي فى المحشي 

اه والله وانا كمان ايه رايك تعمليلنا محشي الجمعه الجايه ؟

شوف انا بقول ايه يقولى ايه ...طيب يا فتحى (الحق عليا مش عايزة اصدمك مرة واحده وبمهدلك )والله مانت عارفه حاجه 

اليوم السادس 

ازيك يا مدام فوزيه ؟ ممعاكيش اى حاجه حادقه ؟

ازيك يا مدام اميرة ..لا والله ليه ؟

اصل الحمل تاعبنى ونفسي فى حاجه حادقه

هو انتى كنتى مرتبه للموضوع ده؟

لا خالص ده انا ماعرفتش غير لما رحت للدكتورة ..كان وشي اصفر ودايخه وماكانش فى بالى ..بس الدكتورة هى اللى عرفت 
سبحاااااااااااااان الله

::

::

::

انا عايزه اروح للدكتورة يا فتحى 

ليه يا فوزية؟

تعبانه يا اخى ..انت مش شايفنى وشي اصفر ازاى  ونفسي فى حاجه حادقه كمان 

طيب ..ادخلى كلى غداكى اللى ماكلتيهوش من امبارح ..ماقلتلك كله من قلة الاكل

لا ماليش نفس 

طيب

ماشي يا فتحى مهو هتحس ازاى .(بكرة هعرف وهخليك تلف حوالين نفسك تحسب البامبرز والمصاريف وابقى تعالى اشتكى ) اناداخله انام ..تصبح على خير 

 وانتى من اهله

اليوم السابع 

صباح الخير يا فوزيه ...انا مش هفطر النهارده ماتتعبيش نفسك 

لا ازاى بقى ..ده انا عامله الفطار من بدرى وفطرت كمان 

ليه خيييييييييير ؟ خلاص اقتنعتي ان الفطار مهم 

اه طبعا ..ده انا كنت صاحيه جعانه قوى 

.طيب والدوخه والوش الاصفر  والحاجه الحادقه ؟؟

لاااااااااااا ...مالهمش لازمه بقى ...طلعت اوهام يا فتحى

:) 

هو يعنى الواحد ناقص تعب وسهر وبامبرز وعياط

ماكفايه القرد اللى بيتنطط على كتافي 

وجتها نيله اللى عايزه خلف

 

اهلا اهلا يا مدام عبير ...الجزء التالت والاخير ..

 تحزير ...الحكايه طويلة
  
هتسالونى اتاخرتى ليه ؟
هقولكم كنت برتب اوراقي للمرحلة المستقبليه فى الشغل 
واعادة تكوين شخصيتي 
ومحاسبة دورية لنفسي خلال الفترة اللى فاتت وتقويمها للفترة اللى جايه


حصلت يمكن حاجات كتير فى الفترة الاخيرة بدخول مدام عبير لمكتبي 


اتغيرت حاجات فى دماغي 
واتكشفت قدام عيني حاجات تانيه 
عن نفسي وعن كتير من الموظفات منهم مدام عبير طبعا 
وعن كتير قوى من الموظفين ومنهم مديري الوقور 




لالالالالا 
ماتحكموش احكام مسبقه ولا تسرحو بخيالكم فى الافلام العربي 


الحكايه ومافيها ان حصلى نوع من تضارب المشاعر والافكار 
وحسيت لايام ان انا مش انا 
وان غيري مش بنفس الصورة اللى كانت فى دماغى 




حاسه انى بتكلم الغاز وشكلكم مش فاهمين حاجه ؟؟؟؟


طيب خلاص هحكي
صلو على النبي
 

مدام عبير ..صباح الخير يا جارى انت فى حالك وانا فى حالي 

ايوة اكتشفت انى ماينفعش انى اصاحب مدام عبير ولا انصحها بالخير او الشر 
فاكرين لما قلتلكم مدام عبير عندها وش تاني 
ظهرلى الوش ده بس على خفيف 
وانا مابحطش واطي بصراحه 
واديتها كلمتين فى جنابها عشان تعرف ان لحمى مر ومش عشان شكلى طيب ولسانى حلو يبقى ماليش وش تانى انا كمان 
بالعكس ده انا زعلي وحش 


امهند لاقيت ان افضل طريقه للتعامل مع مدام عبير هو التعامل السطحى 
مالهاش دعوة بحياتى وماليش دعوة بحياتها 
ولا طريقه تعاملها مع الموظفين 
ولا هيبقى قلبي طيب وخايفه عليها  وانصحها 
لانى اولا مابعرفش انصح الا اللى بحبه قوى 
وثانيا ان فى وجهة نظرها ده مكان شغل
:)
=============================================

مديري العزيز ...شكرا 

اكتشفت بمجي مدام عبير للمكتب 
ان مديري الوقور ..ورغم ان الكل بيشكر فيه وبيحترمه 
الا انه راجل زى بقيت الرجاله 
غصب عنه بتصدر منه فلتات 
طيب احكمو انتو 
لو لاقيت قدامك قطعه جاتو 
وعلبه عارف ان فيها جاتو برضه بس مقفولة 
ايه اللى هيلفت نظرك الاول ؟
اكيد قطعه الجاتو بالوانها وشكلها 
:)

بالظبط كده 
الكلام يبقى مفروض انه ليا 
بس متوجه لمدام عبير 
ابقى فى موضوع انا بخلصهوله 
يروح لمدام عبير يحكيلها الموضوع من اوله لاخره 
ابقى انا اللى مفروض اعرف هو وراه ايه وهيعمل ايه 
الاقيه بيقوله  لمدام عبير وانا مفروض اسمع بالتبعيه 
مش تعدى على شغلى لانها مش هتعمل شغلى 
ولا هو بيطلب منها تعمله 
لكن بطبيعه الحال وبشكل عفوي بيبص لمدام عبير 


:)


لاقيت نفسي بغير 
وحاسه انى ماليش مكانه فى المكتب 
وانى عايزة اخليه يركز فى كلامه معايا 
ولكن ...وقفت قدام نفسي 
وقلت اللى عليا بعمله 
وهو مايمثليش شىء ابدا فى حياتى وممكن فى اى لحظه اسيب الشغل وهيجيب حد غيري يعمل نفس شغلي
ولو حرصي على مركزى فى الشغل يخلينى اتنازل عن مبادئي واخلاقي واسلوب تعاملى مع اى حد يبقى الافضل اسيب الشغل 
واستعنت بالله 
وبقى الموضوع بالنسبالي عادي جدا 
بل بالعكس بقيت لما الاقيه بيكلمها اعمل نفسي مش سامعه  او اضحك من تصرفاته العبيطة ..بصراحه عبيطة فعلا
وبقيت مانفذش اى حاجه غير لما يوجهلى الكلام 
وشغلى بعمله على اكمل وجه 
والتوفيق من عند الله

==================================

ليه اتحايلتى على مدام عبير تيجي تقعد معاكي

كنت عارفه ان  قعادى فى المكتب لوحدى جنب مكتب المدير شىء سىء جدا

وان نظرات الموظفين وخصوصا انى كنت لسه جديده وجيت المكان ده كانت نظرات فيها تساؤلات كتير 

مش بعيد كانو فاكرين انى مراته  التانيه

:)

الى جانب ان كان كل الحقد  كان مركز عليا من اى موظف او موظفه كانت تتمنى انها تبقى مكانى

وكنت شايفه ان حل كل المشاكل دى هى وجود موظفة تانيه معايا 

وبالتالى لما عرفت ان مدام عبير هى اللى هتيجي معايا فى المكتب 

كانت بالنسبالى طوق النجاة  وكان لازم اتمسك بيها ومارفضش ابدا وجودها معايا بل ارحب بيها جدا

الانظار هتتلفت ليها والحقد هيتقسم عليا وعليها

واى حد كان فى دماغه فكرة هتتلغى

عرفتو ليه اتمسكت بمدام عبير ؟

مهما اختلفت معاها فى كتير من التصرفات

:)

ربنا يخليكي لينا يا مدام عبير

اهلا اهلا يا مدام عبير ...الجزء التاني

لغز من8 حروف
م د ا م ....ع ب ي ر

ايوة يعني مين ؟

.........

طيب امتى ؟

قريب ان شاء الله 

انا قربت اكلم الحيطان  اللى فى الاوضة...مش قلتو قريب ؟؟مين بقى 

..................

طيب المكتب هييجي امتى الاوضة؟

قريب ان شاء الله 

خلاااااااااااص طظ فيكم كلكم 
انتو عاملينه لغز 
اللى ييجي ييجي واللى مايجيش مايجيش 
خلينى قاعده كده للى رايح واللى جاى مش لاقى حد غيري يبص عليه 
.
.
.
.
هااااااااااااااااااااا ..المكاتب جت 
مين بقى ؟

...........

برضه ؟يا ولاد اللذين مااااااااااشي اديها طناش بقى 
.
.
.
.

ايه المنظر ده؟؟؟؟يا عم عبده ماينفعش كده ...انت هتسيب الاوضه كده ؟ ده ولا كاني فى مخزن ؟

بعدين هاجي  اظبطه 

طيب ماتشوف مين اللى هييجى يقعد على المكتب ييجى النهارده وتظبط الاوضه بالمرة 

................

ماااااااااااشي ..مانا اللى انسحبت من لساني زي العيال ..نرجع للطاش




لالالالالا
انا مش هقعد كده فى الكركبه دى ولحد امتى ؟

يا مديري المحترم ..ممكن تقول لعم عبده ييجى ينظف المكان ويروقه انا حاسه انى قاعده فى مخزن

هههه..طيب 

لا بجد والله الاوضه شكلها وحش قوى وانا معرفش اقعد فى كركبه كده 

يعنى انتى مابتحبيش الكركبه فى بيتك 

لا طبعا ...صحيح بيتكركب بس بروقه على طول 

طيب مش عايزة تعرفى مين هييجى معاكي فى المكتب :)

لاخلاص مش مهم اعرف ..انتو محسسنى انه لغز ...المهم الاوضه تتروق

...........

يابن الاييييييييييه ....برضه كده ؟ طيب اوك 

ايه رايك يا مدام عبير ؟

اممممممم ..مش عارفه بجد ...

ايه ده ؟؟؟هما بيسالوها رايها فى ايه بالظبط ؟؟؟وانا قاعده ؟ هما بياخدو رايها فيا ولا ايه  ؟؟؟
 :)

لالالا ....مش عايزه ...انا مرتاحه فى مكتبي 

بس ده مدير مدير مديري هو اللى قال تييجى هنا 

ها ؟  نعم ؟ مين فين امتى ؟ تيجيى فين ؟ مدام عبيييييييييير تييجى معايا انا ؟يعنى كده انا راحت عليا...خلاص هينفضولى ويجيبو مدام عبير مكاني 
:(

ها يا مدام عبير ؟ خلاص هتييجى هنا فى مكتب كبير وفى اوضه واسعه

لالالا ...ليه بس؟ ...انا مرتاحه فى مكتبي

بس ده مكتب كويس يا مدام عبير وبعيد عن الدوشة والهيصه والرغي

لالالا...امممممممم ..طيب هفكر 

تفكرى فى ايه اختي ..هو حد يحلم يقعد فى المكتب اللى جنب المدير ...تعالى ياختي تعالى ولا انا مش عاجباكي ؟؟؟ولا يمكن مش عاجباكى ...بتتامرى كمان وبيتحايلو عليكي ....عملالهم سحر دى ولا ايه ؟
.
.
.
.
.
هى هتتامر كمان ...وهو انا هقعد افرك كده واستنى لما تفكر ..هو انا قد كده بخوف العيال؟
طيب والله لاتصل بيكي واخليكي تيجي تقعدى فى وشي 
على الاقل اامن سحرك ياختي واهو انتى احسن من غيرك اللى  لسه ماعرفتوش  واهو ست تقعد معايا احسن من راجل يجيبلى مشاكل فى البيت
.....

ها يا مدام عبير ؟ فكرتى فى كلامهم ؟

لسه بفكر والله مش عارفه 

هو انا قد كده وحشة ومش عايزه تقعدى معايا ؟

لالالالالا ابدا ماتقوليش كده ..بس انا اتعودت على مكانى ومكتبي وماصدقت اخد على المكان 
بس بجد هنا انسبلك ..ده حتى مدير المدييييييير هو اللى اختاره ليكي وشايفه ميزة مش عيب..وقال مدام عبير تييجى تقعد هنا مع الموظفه الجديده

ا(اه ياختي ماتفتكريش اني همشي ...لاااااااااا..قاعدالك على قلبك)ا

)    

والله انا عارفه ...بس متردده 

لالالا تعالى تعالى تونسيني وتقوليلهم يظبطو الاوضه ونرتاح بقى من الانتظار ده 

طيب خلاص انا جايه 

...........
.
.
يا بركاااااااااتك يا مدام عبير 

بقدرة قادر وباسرع من سرعه الصوت والضوء والالوان 
الاوضه اترتبت
والكمبيوتر بتاع مدام عبير وصل المكتب  واتوصل فى اقل من نص ساعه
والمفتاح اللى انا  طلبته بقالى 3 شهور جالى انا نسخه وهى نسخه...طبعا لازم نسخه لمدام عبير امال تبقى زيي تييجى تلاقى الاوضه مقفوله وتدور بالنص ساعه على اللى يفتحولها..مايصحش برضه 
والدولاب اللى ريقي نشف من طلبه وصل الاوضه واتحط فى مكانه التمام 


والاوضه دبت فيها الروح ..والالوان ..والبرفان ...
وظهرت الرجاله ....وشوية ستات
:)

اهلا اهلاااااااااااااا يا مدام عبير 

والله انا مش عارفه انا من غيرك كنت هعيش ازاى  فى المكتب لوحدى

واستنونى الجزء التالت 
:)

اهلا اهلا يا مدام عبير ...الجزء الاول

اول مرة اشوفها كان اول يوم ليا فى التدريب 

وساعتها قلت ماشاء الله مين العسولة القمر دى

ومدام عبير هنا مثال واحد من ضمن 4 او 5 امثلة فى الشغل 

كلهم تقريبا نفس الوصف للاسف 

ربنا يهدينا جميعا

الكعب العالي 

الشعر المتسرح ..كل يووووووووم ..مافيش مرة تيجي منحكشة

البرفان اللى يوصلكم من قبل ما تدخلو المكتب اللى هى فيه

اللبس الشيك 

الابتسامة الهادية والصوت الرقيق

والذوق والاحترااااااااااام الشديد ...اللى يخليك غصب عنك لازم تحترمها ..والا هتشوف وشها التانى واللى بعده هتلاقى نفسك برة المؤسسة مطرود شر طرده 

يجعل كلامنا خفيف عليكي يا مدام عبير 

اصل سحرها وااااااااصل ...ونفوذها نااااااااااااافذ لحد مكتب مدير مدير المدير 

وده ماعفرتوش غير متاخر ...وده هيكون تفسيره فى الجزء التانى

مدام عبير 

مش فى مركز كبير لكن فى وظيفه مهمة فى المؤسسة 

ولان يمكن بقالها فترة كبيرة واتقانها لشغلها وطبعا الوصف اللى وصفتهولها 

كلللللللللللل ده عملها مكانة حلوة فى قلوب كل الناس

الا صنفين  على ماظن 

اولا: موظفة جوزها شغال فى المؤسسة ويعرف مدام عبير

وثانيا : موظفة جوزها شاف مدام عبير بالصدفة 

لان فى الحالتين مابيبقاش فى قلب الموظفة اى مكانة غير الغيرة من مدام عبير

وانا بقى من الصنف التاني

 :)

ولان جوزى شافها مرتين تلاته بتصادف يكون موصلنى الصبح  او جاى ياخدنى من الشغل وتكون مدام عبير نازلة فى نفس الوقت 

قررت انى لازمن ولابد اوصل الشغل قبل منها بربع ساعه على الاقل 

او انزل قبل منها بسررررررررررعه الحق الراجل فى الشارع قبل مارقبته تتكسر من التدوير على مادم عبير ...احم احم اقصد من التدوير عليا 

:)

اهلا اهلااااااااااااااااااااااا يا مدام عبير 

والله منورة بجد

ونكمل الجزء الجاى

ده مديري مش من بقيت اهلى ..الجزء التانى

ماتمرش فيه الشيوكلاته 

جابلى الحكايه على بلاطه

بعد تنحي اللى مايتسماش الهى ينتقم منه ويذله 
قلت بقى اروح اوزع شيكولاته فى الشغل افرح الناس كلها واغيظ اللى ماكانوش عاجبهم اللى بيحصل 


ولحظى الجميل 
المدير طلع مش حابب فكرة الكلام فى السياسه فى الشغل

وكان فاضل يقولى فاضلك زلطه وتطلعى برة لو اتكلمتى عن السياسه فى الشغل تانى

رغم انه خد منى الشيكولاته

ودخلت معاه فى حوار طويل عريض عن اللى بيحصل فى مصر
 وطبعا بما انى كنت فاهمه ومتابعه وقاريه وسامعه كتير من ساعه بدايه الثورة على عكسه  اللى مكتفى بثقافته اللى بيستقيها من القناة الاولى المصريه اللى مش محتاجه كلام
عرفت ارد عليه فى كل كلمه قالها

------------------------------------------------------------------------
 ان جت غصب عنك ..خليها بجميلة
من ساعه الموقف اللى فات  ده 
وتقريبا السكوت والكلام القليل اللى كنت بحاول اتبعه كاسلوب انتهى 
و اى حوار المدير يدخلنى فيه له معنى او مالوش 
واضطر ارد رد كويس ولو انى صعب عليا انى احاول ارد رد دبلوماسي

 انا ورايا النهارده مشوار وفى فلان هييجى المكتب تعرفيه ؟اقولك انا

والله مايهمنيش 

اتصلى بعياده الاسنان واجليلي ميعاد الكشف عشان مراتى هى اللى عندها ميعاد مع دكتورها  

الف سلامه على المدام يا حنين 

اتصلى بالمحل الفلانى بتاع  العيال عشان طلبت مقلمه لونها احمر فى اخضر فى اسود ولو مالاقيتش اللون ده  اتصلي بالمحل العلانى و اساليهم على نفس اللون

ومااااااااااااااله ادينى بتسلى مانا مش ورايا حاجه 

طيب خدى الفاتورة دى واتصلى بالشركه قوليلهم فين فرق الخصم 

مااااااشي ..مش هنخلص شكلنا كده 


ولان الموضوع بيحصل بشكل تلقائي 
ولانى صعب ارفض والا مش هعدي التدريب
قلت خلاص ان جت غصب عنك خليها بجميله


-----------------------------------------------
بنت المدير...كتكوتى الحلوة بقت رخمة 

طبعا مانستوش بنت المدير 

اللى بقت كل ماتيجى لازم تاكل البسكوت بتاعى 

ولازم تاخد الاقلام تلعب بيها  وترسم بيها وتسيبها مرمية وتمشي

وبصراحه البنت امورة وانا قلبي ضعيف مع البنات  حتى لو رخمين

فبقيت اسيبها تعمل اللى هى عايزاه

مهى طفله فى الاول وفى الاخر 

وكمان بقت تروح المدرسه 

يعنى ماعدتش تيجى اصلا غير كل فين وفين 

:)

======================

تــــحــديــــث

دى شيكولاتة لكل اللى يزورو المدونة

وماتخافوش فى كتير منها

:)

وادى جلاكسي بالبندق عشان خاطر 
carmen اسماء و

وادى كادبورى الكبيرة عشان خاطر اخر العنقود
بس ملاقيتش اللى مكتوب عليها دوق طعم السعاده

ودول بقى للاحلام ولمرمر ومصطفى وكووووول المكاتب الصديقة

يللا هيصو بقى 
:)

ده عند امه يادهم

لو حتى مش من من حقى اغير .بما انى دايما بكبر المواضيع ...من حقى اخاف على سمعتى وسمعته 

ومن حقى  اخاف على بيتى وانا شايفه غرايب الدنيا بتحصل حواليا  وبيوت بتتخرب من شطه كبريت

يعنى ايه يوصل زميلته لشغلها لمده اسبوع ولا اكتر ؟
هى متجوزة وهو متجوز صحيح 
بس جوزى مركزه احسن مليون مرة من جوزها يعنى مش بعيد انها تعجب بيه وباسلوبه اللى طبعا معاها مختلف عن اسلوبه معايا ..اصل انا مراته استحمل تعبه وزهقه واتكلم مش مهم يرد لكن هى طبعا مايصحش مايردش عليها


الغيرة واضحه مش كده؟
.؟؟؟؟؟؟؟؟؟؟
وجوزها ولا فارق معاه انها تركب مع جوزى العربيه كل يوم رايح جاى من الشغل
وكلمت جوزى بكل هدوء

قلتله يوم ماشي اتنين معلش لكن اسبوع او اكتر بمناسبه ايه ؟

معلش بقى جوزها مش هينفع يوصلها الاسبوع ده ولازم نخدمهم 

طيب ما هى معاها ستات تانيه ماتروح معاهم ؟

  ماحدش عرض عليها تروح وتيجى معاهم اعملها ايه
طيب حرام ؟

ده كام يوم وخلاص..  دى ضرورة ..وبعدين دى بتركب يا دوبك 10 دقايق ..كمان فى الكنبة اللى ورا مش جنبي
طيب مايصحش ؟

وليه ما يصحش مهى زميلتى
طيب كلام الناس ؟

ماحدش فايق لحد ..ماتكبريش الموضوع
 طيب انت ترضاها ليا ان حد زميلى  يوصلنى شغلى كل يوم  واروح معاه كل يوم ؟

اه ارضى

!!!!!!!!!!!!!!!!!!!!!!!!!!!!!!

ده مديري ..ماكانش من بقيت اهلى ..الجزء الاول

فى البدايه اعذرونى يعنى لو اسلوبي مش رقيق حبتين واللى مفروض يكون كده بحكم انى انثي 

لانى ماتعودتش انى ارسم نفسي ولا اعدل شكلى عشان امثل دور معين 

وخوصا لما تكون دى يومياتى 

يعنى مش هعدل اسلوب كتابتى 

لانها ببساطه بتعبر عن افكاري 

ندخل فى الموضوع 

الوش الطماطمايه

بحكم مرور الوقت فى المكتب اللى بقعد فيه 8 ساعات متواصله 

وبحكم ان شغلى بيعتمد على تعليمات المدير  والكلام المباشر معاه

فطبيعى ان الوش الاحمر الطماطمايه يختفي 

فاكرينه ؟

:)

المكتبة

بمرور الوقت والدخول فى الشغل الحقيقي

اكتشفت انى ناقصنى شويه مستلزمات مكتبيه 

وبشكل عفوى لاقتنى بفكر ان مكتب المدير هو كمان محتاج شويه مستلزمات 

مهو مش معقول لما اكون عايزة ادبس ورقه فى ملف فى مكتبه اروح على مكتبى اجيب دباسه او دبابيس 

و جبت الحاجه من مكتبة الشغل ..اللى طبعا لو كانت بفلوس ماكنتش هجيبله حاجه 

وحطيتها عندى وبعدين اللى ناقص فى مكتبه حطتهوله قدامه من سكات  

طبعا الراجل ماهموش 

عادي ..بابا بيجيبلنا منه كتير 

:)

ولا شكرا حتى قالها 

  داء التنظيم

  لما كنت اروح مكتب جوزى فى شغله كنت لازم اقعد اروق وانظم ورقه 
لانه مايعرفش يعنى ايه نظام 

ولما اشتغلت لاقيت المدير نفس الكركبه 

وكانها طبيعه فيكم يا رجاله

!!!!!!!!!!!!!! 

ولانى بتحط فى اى ورقه المدير مابيلاقيهاش على مكتبه ويقعد يلففنى المؤسسه كلها ادور عليها وفى الاخر بتطلع فى وسط الورق فى ملف من الملفات الكتير اللى على مكتبه

بقيت اهتم ان مكتبه مايكونش عليه كركبه
رغم انى بعمل كده بشي من الحذر وبهدوء 

وساعات ايدي  تسبق تفكيري والاقينى بروق بس افوق واقول لا ماينفعش اعمل كده قدامه ليفتكر انى بهتم بيه هو لشخصه 
   

الى جانب ان لازم مكتبى يكون منظم لانه عنوان مكتب المدير

فما بالكم بقى لما يكون المدير بيدخله ناس من اى حته فى اى مكان فى مصر ؟

وسؤال شاغلنى قوي
هو انا كده صح ولا غلط ؟

تابعونى  فى الجزء التانى 

اكيد طولت عليكم النهارده

:)

مبروك لمصر ..واللى مش عاجبه يروح على شرم

ماكانش ينفع ارجع اتكلم كلام عادي كده 

لان فى الاول وفى الاخر دى يومياتى  

الثورة عملت بعض الشروخ بين كتير من الناس

وبينت معادن ناس كانت مستخبية فى تراب المواصلات ورملة العيش

وزعلت ناس من بعضها برضه 

وخلت المسافه بين بعض الناس توسع

وقربت مسافاااااااااااااااااااات بين ناس كتير قوى

وطبعا كل ده اثر عليا بشكل شخصي وعلى المصريين بشكل عام 

كان اطول 3 اسابيع عدو عليا من ساعه ماتولدت 

لكن عموما 

الف مبرووووووووووووووووووك الحرية لمصر وللمصريين 

:)

واللى مش عاجبه وزعلان يروح يقعد فى شرم مع حبايبه 

فى الوش مرايا وفى القفا ....استغفر الله العظيم

انا موووووووووتى وسمي حد يجيب فى سيرتى من ورايا 

لا وكمان يتريق او يحسد 

ومن شر حاسد اذا حسد 

ومن شر حاسد اذا حسد

عندى كده فى الشغل مجموعه

اعوووووووووووذ بالله مابيسبوش حد فى حاله ابدا 

تيجى الموظفة تخلص معاهم ورقه ولا تسالهم على حاجه وتمشي

تلاقيهم ما سبوهاش فى حالها

شوفى لبسها 

شوفى جزمتها 

شوفى مراخيرها 

اعوووووووووووذ بالله 

حاولت اول مابدات شغل معاهم اقولهم ماينفعش كده 

ولا كانى بتكلم 

بقيت اسكت او اسيبلهم المكان كله وامشي مهم مابيسكتوش 

بس بعد شويه بقيت احس انى امشي من هنا 

والكلام يشتغل عليا من هنا 

وبقيت احس ان عيونهم  ابر بتشكك فى ظهري وانا ماشيه 

والادهى بقى انهم المفروووووووووووض اقرب ناس ليا فى الشغل 

يعنى اصحاب 

لكن هو اللى فيه طبع هيسيبه ابدا ؟

مابقتش احب اروح اقعد معاهم 

ولا حتى اروح وقت البريك

لكن باجى على نفسي امال هفضل قاعده لوحدى طول النهار 

لكن النهارده 

قررت مش هروح اقعد فى وسطهم تانى خلاص 

ولا حتى هخرج فى اى حته معاهم 

انا يتريقو عليا ؟ ويضحكو قوى و  يقهقهو من الضحك على حاجه ماتضحكش اصلا ..لكن عايزة حد يستوعبها صح

طيب هما مابيفهموش ومخهم على قدهم وانا عارفه كده كويس قوى..مش تقليل من قيمتهم ولا تكبر عليهم ..لكن فعلا هما مابيشغلوش مخهم ابدا 

..وعشان كده رحت ماشيه وسيباهم 

عشان يعرفو يتريقو كويس ويجيبو فى سيرتى براحتهم 

انا لا احب حد يتريق عليا 

ولا بتريق ولا بغلط فى حد ابداااااااااااااااااااااا 

يبقى نبعد عنهم احسن حتى لو هبقى لوحدي 

بنت المدير جات ...بنت المدير غاااااااااااارت

انا مالى اذا كان المدير بنته بتجيله الشغل ؟

هشتغلها بيبى سيتر ولا ايه ؟

اقعد اطبعلها فى رسومات وتقعد تلون فى مكتبى بمناسبه ايه بقى ؟

ده حتى بت بايخه ولا بتقول شكرا وللا لو سمحتى ولا اى حاجه 

ومع ذلك قلت ماشي وحاولت اعاملها كطفله ولو انى مابعرفش اتعامل مع العيال اللى معرفهاش 

ولكن عملت اللى عليا وقعدتها فى مكتبى قاعده ترغى وتتنطط وتشيل فى الاقلام وتحطها وتشخبط على الترابيزة

لحد ما ابوها جه خدها وريحنى 

كان عندى كلام كتير جدا عايزة اطرطشه فى وشه 

زى بنتك دى علمها تشكر الناس 

وخلى بنتك تعرف تتعامل مع الاكبر منها باسلوب احسن من كده 

وماتجبش بنتك عندى فى المكتب عشان ماتعطلنيش 

ولكن قلت لا مش قايله  الطيب احسن وكمان بنته الوحيده والناس كلها عماله تدلع فيها 

مهى بنت المدير بقى

وانا اللى اجى اقوله علم بنتك الادب 

فى نفس الوقت ييجى لسانى ينطق حاجه كويسه عن البنت 

ابدااااااااااااااااااا

اجى اعمل زى ما الباقى بيعمل وادلعها 

ابداااااااااااااااااااااا

وكأن بقى مقفول بالضبه والمفتاح 

و لا انا عايزة ادلعها 

وخايفه اجامل ابوها يفتكرنى بنافقه 

وكمان مش عايزة الكلام بينى وبينه يزيد عن المحدود 

عارفه ان جو الشغل بيفرض علينا بعض المجاملات 

وسبحان الله انا بعمل كده وبجامل بعض الرجاله الموظفين المحترمين فى الشغل 

ولو واحده ست هى اللى جايبه بنتها يمكن اجى على نفسى واجاملها واشكر فى بنتها وخلاص

   كمان بنته دى عندها 4 سنين بس

ناقصه انا عيال 

كان فاضل كمان تقولى عايزة اعمل بيبى