Saturday, March 26, 2011

اهلا اهلا يا مدام عبير ...الجزء التالت والاخير ..

 تحزير ...الحكايه طويلة
  
هتسالونى اتاخرتى ليه ؟
هقولكم كنت برتب اوراقي للمرحلة المستقبليه فى الشغل 
واعادة تكوين شخصيتي 
ومحاسبة دورية لنفسي خلال الفترة اللى فاتت وتقويمها للفترة اللى جايه
حصلت يمكن حاجات كتير فى الفترة الاخيرة بدخول مدام عبير لمكتبي 
اتغيرت حاجات فى دماغي 
واتكشفت قدام عيني حاجات تانيه 
عن نفسي وعن كتير من الموظفات منهم مدام عبير طبعا 
وعن كتير قوى من الموظفين ومنهم مديري الوقور 


لالالالالا 
ماتحكموش احكام مسبقه ولا تسرحو بخيالكم فى الافلام العربي 
الحكايه ومافيها ان حصلى نوع من تضارب المشاعر والافكار 
وحسيت لايام ان انا مش انا 
وان غيري مش بنفس الصورة اللى كانت فى دماغى 


حاسه انى بتكلم الغاز وشكلكم مش فاهمين حاجه ؟؟؟؟
طيب خلاص هحكي
صلو على النبي
 




مدام عبير ..صباح الخير يا جارى انت فى حالك وانا فى حالي 
ايوة اكتشفت انى ماينفعش انى اصاحب مدام عبير ولا انصحها بالخير او الشر 
فاكرين لما قلتلكم مدام عبير عندها وش تاني 
ظهرلى الوش ده بس على خفيف 
وانا مابحطش واطي بصراحه 
واديتها كلمتين فى جنابها عشان تعرف ان لحمى مر ومش عشان شكلى طيب ولسانى حلو يبقى ماليش وش تانى انا كمان 
بالعكس ده انا زعلي وحش 
امهند لاقيت ان افضل طريقه للتعامل مع مدام عبير هو التعامل السطحى 
مالهاش دعوة بحياتى وماليش دعوة بحياتها 
ولا طريقه تعاملها مع الموظفين 
ولا هيبقى قلبي طيب وخايفه عليها  وانصحها 
لانى اولا مابعرفش انصح الا اللى بحبه قوى 
وثانيا ان فى وجهة نظرها ده مكان شغل
:)
=============================================



مديري العزيز ...شكرا 
اكتشفت بمجي مدام عبير للمكتب 
ان مديري الوقور ..ورغم ان الكل بيشكر فيه وبيحترمه 
الا انه راجل زى بقيت الرجاله 
غصب عنه بتصدر منه فلتات 
طيب احكمو انتو 
لو لاقيت قدامك قطعه جاتو 
وعلبه عارف ان فيها جاتو برضه بس مقفولة 
ايه اللى هيلفت نظرك الاول ؟
اكيد قطعه الجاتو بالوانها وشكلها 
:)
بالظبط كده 
الكلام يبقى مفروض انه ليا 
بس متوجه لمدام عبير 
ابقى فى موضوع انا بخلصهوله 
يروح لمدام عبير يحكيلها الموضوع من اوله لاخره 
ابقى انا اللى مفروض اعرف هو وراه ايه وهيعمل ايه 
الاقيه بيقوله  لمدام عبير وانا مفروض اسمع بالتبعيه 
مش تعدى على شغلى لانها مش هتعمل شغلى 
ولا هو بيطلب منها تعمله 
لكن بطبيعه الحال وبشكل عفوي بيبص لمدام عبير 
:)


لاقيت نفسي بغير 
وحاسه انى ماليش مكانه فى المكتب 
وانى عايزة اخليه يركز فى كلامه معايا 
ولكن ...وقفت قدام نفسي 
وقلت اللى عليا بعمله 
وهو مايمثليش شىء ابدا فى حياتى وممكن فى اى لحظه اسيب الشغل وهيجيب حد غيري يعمل نفس شغلي
ولو حرصي على مركزى فى الشغل يخلينى اتنازل عن مبادئي واخلاقي واسلوب تعاملى مع اى حد يبقى الافضل اسيب الشغل 
واستعنت بالله 
وبقى الموضوع بالنسبالي عادي جدا 
بل بالعكس بقيت لما الاقيه بيكلمها اعمل نفسي مش سامعه  او اضحك من تصرفاته العبيطة ..بصراحه عبيطة فعلا
وبقيت مانفذش اى حاجه غير لما يوجهلى الكلام 
وشغلى بعمله على اكمل وجه 
والتوفيق من عند الله

==================================

ليه اتحايلتى على مدام عبير تيجي تقعد معاكي
كنت عارفه ان  قعادى فى المكتب لوحدى جنب مكتب المدير شىء سىء جدا
وان نظرات الموظفين وخصوصا انى كنت لسه جديده وجيت المكان ده كانت نظرات فيها تساؤلات كتير 
مش بعيد كانو فاكرين انى مراته  التانيه
:)
الى جانب ان كان كل الحقد  كان مركز عليا من اى موظف او موظفه كانت تتمنى انها تبقى مكانى
وكنت شايفه ان حل كل المشاكل دى هى وجود موظفة تانيه معايا 
وبالتالى لما عرفت ان مدام عبير هى اللى هتيجي معايا فى المكتب 
كانت بالنسبالى طوق النجاة  وكان لازم اتمسك بيها ومارفضش ابدا وجودها معايا بل ارحب بيها جدا
الانظار هتتلفت ليها والحقد هيتقسم عليا وعليها
واى حد كان فى دماغه فكرة هتتلغى
عرفتو ليه اتمسكت بمدام عبير ؟
مهما اختلفت معاها فى كتير من التصرفات

:)

ربنا يخليكي لينا يا مدام عبير
Posted by at

16 comments:

  1. مصطفى سيف الدينMarch 27, 2011 at 12:27 AM

    طبعا اسلوب عبير ومحاولة جذب الانتباه بابراز المفاتن ده اسلوب غير مقبول
    وانا مستغرب ازاي مدام وازاي تلجأ للاسلوب ده
    بس في نفس الوقت الغيرة منك غير مقبولة
    هو انتو في شغل ولا في سيرك؟
    المدير كده بكلامك عنه راجل مش ولا بد لان المدير الصح يكلم كل واحد مسئول عن حاجة في الشغل تخصه مش تعرفي واجباتك من عبير
    معلش الصبر يا ستي
    وزي ما بيقول الله تعالى)أَنْـزَلَ مِنَ السَّمَاءِ مَاءً فَسَالَتْ أَوْدِيَةٌ بِقَدَرِهَا فَاحْتَمَلَ السَّيْلُ زَبَدًا رَابِيًا وَمِمَّا يُوقِدُونَ عَلَيْهِ فِي النَّارِ ابْتِغَاءَ حِلْيَةٍ أَوْ مَتَاعٍ زَبَدٌ مِثْلُهُ كَذَلِكَ يَضْرِبُ اللَّهُ الْحَقَّ وَالْبَاطِلَ فَأَمَّا الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي الأَرْضِ كَذَلِكَ يَضْرِبُ اللَّهُ الأَمْثَالَ
    (
    ففي النهاية هينتصر الحق وسيظل ما ينفعل الناس مهما كان الباطل يجذب العيون لكن ما يستقر في الارض هو ما ينفع الناس
    تحياتي

    ReplyDelete
  2. CarmenMarch 27, 2011 at 10:15 AM

    للاسف الست بقيت في مجال العمل كده واجهة جذابة واللي بيحاول يعيش صح الناس برضه مابتسبوش في حاله
    ربنا يهدي
    تسلم ايديك حبيبتي

    ReplyDelete
  3. Days and NightsMarch 27, 2011 at 1:16 PM

    أختى الغالية

    الحياه العملية زخر بالكثير من الضايقات ... المهم هو كيفية الغلب على هذه الصعاب مع الثقة بأنفسنا وعدم التخلى عن القيموالمبادىء التى تربينا عليها .. لأننى متأكد إنا الباقية .

    شكرا على ما كتبتى وما سوف تكتبين .

    تحياتى

    أخوك / تامر

    ReplyDelete
  4. ابراهيم رزقMarch 28, 2011 at 8:48 AM

    فى النهاية لا يصح الا الصحيح و صاحب المبدء لا يهزم ابدا

    الاساليب الملتوية مسيرها تنكشف و فى النهاية مصلحة الشغل

    اعملى ما يمليه عليك ضميرك و سيبيها على الله

    ReplyDelete
  5. الاحلامMarch 28, 2011 at 1:10 PM

    من حرصنا على من يهمنا الى هو انتى طبعا سنجتمع كلنا ونعمل واقفه احتجاجيه ونعمل لافته مكتوب عليها (المدونين يريدوا اسقاط مدام عبير) وبكده يبقى احنا عملنا الى علينا وقمنا بالواجب معاكى
    الثقه بالنفس هنا اختى الكريمه هى سلاح الموظفه لان ثقتها فى نفسها تجعلها لا تعطى اهتماما لا بمدام عبير ولا بغيرها لانها والحمد لله تقوم على عملها على اكل وجه
    تحياتى لكى وتحياتى لمواضيعك الشيقه وفو انتظار ما بعد مدام عبير يمكن بنت المدير تكون كبرت شويه ويكون ليها موضوع معاكى
    تقبلى تحياتى الاحــــــلام

    ReplyDelete
  6. mrmrMarch 29, 2011 at 11:54 AM

    رايك منطقى قوى فى تقسيم الحقد على اثنين
    تحياتى

    ReplyDelete
  7. دعاء العطارMarch 31, 2011 at 12:44 PM

    أى شغل ... لااازم يبقى فيه عقبات

    بس اكيد انتى بتزدادى خبره من المشاكل دى

    بس المهم انها ماتكسركيش

    دمتى بكلللل ود

    :)

    ReplyDelete
  8. مدونة رحلة حياهMarch 31, 2011 at 1:46 PM

    السلام عليكم
    كيفك يا مدير
    كبر دماغك واهتم بشغلك مترميش ودنك لحد ومتهتمش بغيرك طالما مش هيضر بيك وشخصيتك وكرامتك بتعلم غيرك ازاى يتعامل معاك
    المواقف بتدى انطباعات مهمه فخليها لصالحك فى الصح
    الله معك

    ReplyDelete
  9. سكرتيرة جديدةApril 3, 2011 at 2:36 AM

    مدونة رحلة حياة
    ----------------
    حاضر يا معلم
    :)

    ReplyDelete
  10. سكرتيرة جديدةApril 3, 2011 at 2:37 AM

    دعاء العطار
    ------------
    اهلا يا دعاء
    مرحبا بيكي فى المدونة
    طبعا يموت المعلم ولا يتعلم

    :)

    ReplyDelete
  11. سكرتيرة جديدةApril 3, 2011 at 2:38 AM

    mrmr
    -----
    كلامك قليل المرة دى
    خير؟
    حاسيت مش عاجبك الموضوع كله على بعضه
    :)

    ReplyDelete
  12. سكرتيرة جديدةApril 3, 2011 at 2:39 AM

    الاحلام
    ------
    كلامك فى محله طبعا
    الثقه فى النفس هى اساس النجاح فى اى فى شغل
    :)

    ReplyDelete
  13. سكرتيرة جديدةApril 3, 2011 at 2:40 AM

    ابراهيم رزق
    -----------
    اهلا بيك فى المدونة
    اول زيارة ليك هنا واتمنى وجودك باستمرار
    :)

    ReplyDelete
  14. سكرتيرة جديدةApril 3, 2011 at 2:41 AM

    Days and Nights
    ----------------
    اخبارك ايه يا تامر ؟

    شكرا لردك الجميل
    :)

    ReplyDelete
  15. سكرتيرة جديدةApril 3, 2011 at 2:42 AM

    carmen
    ------
    فعلا يا كارمن
    بيستغلوها غلط

    شكرا على اهتمامك
    :)

    ReplyDelete
  16. سكرتيرة جديدةApril 3, 2011 at 2:44 AM

    مصطفى سيف
    ----------

    يااااااااااااه كل ده كلام
    يعنى تعبناك جامد يا باشا

    شكرا على اهتمامك وردك الوقور

    وانا ماحبتش اعيش نفسي فى سيرك
    والحمد لله الحال ماشي
    وكله فى السليم يا فندم

    :)

    ReplyDelete

Subscribe to: Post Comments (Atom)