Tuesday, March 1, 2011

ده مديري مش من بقيت اهلى ..الجزء التانى

ماتمرش فيه الشيوكلاته 
جابلى الحكايه على بلاطه

بعد تنحي اللى مايتسماش الهى ينتقم منه ويذله 
قلت بقى اروح اوزع شيكولاته فى الشغل افرح الناس كلها واغيظ اللى ماكانوش عاجبهم اللى بيحصل 


ولحظى الجميل 
المدير طلع مش حابب فكرة الكلام فى السياسه فى الشغل

وكان فاضل يقولى فاضلك زلطه وتطلعى برة لو اتكلمتى عن السياسه فى الشغل تانى

رغم انه خد منى الشيكولاته

ودخلت معاه فى حوار طويل عريض عن اللى بيحصل فى مصر
 وطبعا بما انى كنت فاهمه ومتابعه وقاريه وسامعه كتير من ساعه بدايه الثورة على عكسه  اللى مكتفى بثقافته اللى بيستقيها من القناة الاولى المصريه اللى مش محتاجه كلام
عرفت ارد عليه فى كل كلمه قالها

------------------------------------------------------------------------
 ان جت غصب عنك ..خليها بجميلة
من ساعه الموقف اللى فات  ده 
وتقريبا السكوت والكلام القليل اللى كنت بحاول اتبعه كاسلوب انتهى 
و اى حوار المدير يدخلنى فيه له معنى او مالوش 
واضطر ارد رد كويس ولو انى صعب عليا انى احاول ارد رد دبلوماسي


 انا ورايا النهارده مشوار وفى فلان هييجى المكتب تعرفيه ؟اقولك انا
والله مايهمنيش 

اتصلى بعياده الاسنان واجليلي ميعاد الكشف عشان مراتى هى اللى عندها ميعاد مع دكتورها  

الف سلامه على المدام يا حنين 
اتصلى بالمحل الفلانى بتاع  العيال عشان طلبت مقلمه لونها احمر فى اخضر فى اسود ولو مالاقيتش اللون ده  اتصلي بالمحل العلانى و اساليهم على نفس اللون
ومااااااااااااااله ادينى بتسلى مانا مش ورايا حاجه 


طيب خدى الفاتورة دى واتصلى بالشركه قوليلهم فين فرق الخصم 
مااااااشي ..مش هنخلص شكلنا كده 


ولان الموضوع بيحصل بشكل تلقائي 
ولانى صعب ارفض والا مش هعدي التدريب
قلت خلاص ان جت غصب عنك خليها بجميله


-----------------------------------------------
بنت المدير...كتكوتى الحلوة بقت رخمة 
طبعا مانستوش بنت المدير 
اللى بقت كل ماتيجى لازم تاكل البسكوت بتاعى 
ولازم تاخد الاقلام تلعب بيها  وترسم بيها وتسيبها مرمية وتمشي
وبصراحه البنت امورة وانا قلبي ضعيف مع البنات  حتى لو رخمين
فبقيت اسيبها تعمل اللى هى عايزاه
مهى طفله فى الاول وفى الاخر 
وكمان بقت تروح المدرسه 
يعنى ماعدتش تيجى اصلا غير كل فين وفين 
:)

======================

تــــحــديــــث

دى شيكولاتة لكل اللى يزورو المدونة
وماتخافوش فى كتير منها
:)

وادى جلاكسي بالبندق عشان خاطر 
carmen اسماء و



وادى كادبورى الكبيرة عشان خاطر اخر العنقود
بس ملاقيتش اللى مكتوب عليها دوق طعم السعاده


ودول بقى للاحلام ولمرمر ومصطفى وكووووول المكاتب الصديقة



يللا هيصو بقى 
:)



Posted by at

19 comments:

  1. مصطفى سيف الدينMarch 1, 2011 at 1:27 AM

    ماليش دعوة انا عايز شيكولاتة برضه
    مبروك لمصر
    واسمعي كلام مديرك وبلاش كلام في السياسة تاني :))
    تحياتي

    ReplyDelete
  2. CarmenMarch 1, 2011 at 4:36 AM

    انا عاوزة شوكولاتة جلاكسي بالبندق من ام 3 جنيه ونص ^_^
    انا كمان بحب الاطفال جدا وخصوصا البنات وبكره بهدلتهم ^_^

    ReplyDelete
  3. اسماء عبدالعزيزMarch 1, 2011 at 6:46 AM

    اولا انا كمان عايزة جلاكسي
    مدونتك رائعة واسلوبك بسيط وجميل لكن
    مش هاقولك ماتتكلميش في السياية
    لكن مش كل حاجه خاصة بحياتة الشخصية تعمليه
    واحنا مالنا
    انتِ سكرتيرة بالشغل مش دكتور المدام ولا ببرونه للكتكوته
    ه
    دمت بحب

    ReplyDelete
  4. mrmrMarch 1, 2011 at 9:29 AM

    شكولاتى فين يا قمر
    اشمعنا هما
    طيب مش توزعى على اصحابك فى البلوجر
    ربنا يسعدك يا قمر
    اقعدى بالعافيه

    ReplyDelete
  5. الاحلامMarch 1, 2011 at 1:28 PM

    على فكره انتى لم تمرى على كل المكاتب بدليل اننى لم ارى شكل الشيكولاته ولم اذق طعمها وهذه تفرقه فى المعامله لابد ان تحاسبى عليها
    دعى الحوار ياخد وقته وينتهى ودائما لا تتاثرى بالمواقف الا فى وقتها لانكى لو لم تمررى المواقف فسوف تمرضى من كثرة المواقف البايخه التى تمرين بها فى العمل
    تقبلى تحياتى الاحـــلام

    ReplyDelete
  6. سكرتيرة جديدةMarch 1, 2011 at 4:44 PM

    انتو كلكم عليا ولا اييييييييييييييه ؟

    حاضر هجيبلكم شيوكلاتة من عنيا الاتنين

    ReplyDelete
  7. آخر العنقــــــودMarch 1, 2011 at 5:01 PM

    شكرا على الشوكلاتة بس انا مصممة انى عوزه شوكلاته كادبورى من ام 5 جنية الكبيرة دى ولازم الغلاف يكون مكتوب عليه "دوق طعم السعادة" :D
    ربنا يكرمك فى شغلك واتبعى الاسلوب الوسطى مع المدير، يعنى لا تراضيه اوى ولا تخالفيه اوى :)

    ReplyDelete
  8. مدونة رحلة حياهMarch 2, 2011 at 12:00 PM

    السلام عليكم
    بكلماتك البسيطة بترسمى بسمة كبيرة تتربى فى عزك
    مستنى تانى

    ReplyDelete
  9. هبة فاروقMarch 3, 2011 at 12:20 AM

    انا زعلانة فين الشيكولاتة بتعتى نستينى ماشى
    بهزر معاكى يا قمر وفرقى برحتك شيكولاتة دلوقتى فى حرية مدير اية دة اللى يمنعك تتكلمى
    ولا اقولك السكوت احسن مع الاشكال دى
    سلامى لك

    ReplyDelete
  10. UnknownMarch 3, 2011 at 1:10 PM

    فكرة المدونه روعه
    بجد جميله جدا لكن بحاجه الى ترتيب وتصميم جيد
    اهتمى بده
    ربنا يوفقك يارب

    ReplyDelete
  11. سكرتيرة جديدةMarch 4, 2011 at 11:36 AM

    مصطفى سيف
    ----------
    ماشي يا مصطفى مش هتكلم فى السياسة تانى غير مع الثورة الجايه وتنحى جهاز امن الدولة
    وبكده مش هيخاف من الكلام فى السياسه فى الشغل
    :)

    الشيكولاته وصلت الحق قبل مايخلصوها

    ReplyDelete
  12. سكرتيرة جديدةMarch 4, 2011 at 11:37 AM

    carmen
    -------
    اه طبعا فى حد بيحب البهدلة؟

    اتفضلي الشيكولاتة

    :)

    ReplyDelete
  13. سكرتيرة جديدةMarch 4, 2011 at 11:39 AM

    اسماء عبدالعزيز
    ---------------

    اهلا بيكي يا قمر فى المدونة
    اتمنى زيارتك الدائمة

    ماقدرش ارفضلكم طلب

    شيكولاتة جلاكسي بالبندق ليكي ولكارمن

    :)

    ReplyDelete
  14. سكرتيرة جديدةMarch 4, 2011 at 11:41 AM

    mrmr
    -----
    الشيكولاتة للشيكولاتة

    بس انتوكلكم سبتو الموضوع الاصلي ومسكتو فى الشيكولاتة ليه ؟

    فاتت عليا وانا بكتب البوست بس جريت بسرعه جبتلكم اللى طلبتوه


    غالى والطلب غالي برضه بسمافيش حاجه تغلى عليكم

    :)

    ReplyDelete
  15. سكرتيرة جديدةMarch 4, 2011 at 11:43 AM

    الاحلام
    -----

    همشي واكبر وانفض
    حاضر
    :)

    وبعدين انت طلبت حاجه معينة وانا قلت لا ؟

    وكمان الشيكولاتة اللى جبتهالك انواع كتير وكميتها اكير عشان توزع على العيلة كلها

    :)

    منور يا باشا

    ReplyDelete
  16. سكرتيرة جديدةMarch 4, 2011 at 11:45 AM

    اخر العنقود
    -----------

    بحاول والله امسك العصايه من النص
    بس لانى ماتعودتش ارفض اى طلب شايفاه طلب معقول
    فمش سهل ارفض امر من مديري


    امهند
    المهم
    شيكولاتة كادبري وصلت؟
    :)

    ReplyDelete
  17. سكرتيرة جديدةMarch 4, 2011 at 11:46 AM

    رحلة حياة
    ----------

    الله يكرمك على كلامك الحلو

    بس مافهمتش مستنى تانى ايه ؟
    شيكولاتة؟ولا كلام يرسم الابتسامة؟

    ReplyDelete
  18. سكرتيرة جديدةMarch 4, 2011 at 11:48 AM

    هبه فاروق
    ----------

    هى مش حكايه حرية
    هى حكايه عقول اتبرمجت على السكوت وبى جزء من طبيعه شخصيتها فماينفعش بين يوم وليله تتغير

    ولانى مش عازة اخسر وظيفتى حاولت افهمه بشويش وبعقل ان الامور اتغيرت وكان فاضل اهبده بحاجه على دماغه واقوله فوق الناس فاقت وانت اللى لسه قاعد ورا مكتبك مش فاهم حاجه


    حبيبتى الشيكولاتة كلها تحت امرك
    خدى شيكولاتة بالبندق
    انا بحبها قوي
    :)

    ReplyDelete
  19. سكرتيرة جديدةMarch 4, 2011 at 11:50 AM

    ياسو
    ------
    يعنى انا يهمنى اكتر مضمون المدونة عن شكلها

    كتير بدخل مدونات كلها حركات وبهرجه وفى الاخر بوستاتها اى كلام ومالهاش معنى

    صحيح فى ناس مدوناتها جميلة قلبنا وقالبا لكن قليل

    وبعدين ماباليد حيلة
    اللى بقدر عليه بعمله

    مش مصممة ديكور انا للاسف


    اتفضل شيكولاتة
    :)

    ReplyDelete

Subscribe to: Post Comments (Atom)