Monday, January 24, 2011

فى الوش مرايا وفى القفا ....استغفر الله العظيم

انا موووووووووتى وسمي حد يجيب فى سيرتى من ورايا 
لا وكمان يتريق او يحسد 



ومن شر حاسد اذا حسد 
ومن شر حاسد اذا حسد
عندى كده فى الشغل مجموعه
اعوووووووووووذ بالله مابيسبوش حد فى حاله ابدا 
تيجى الموظفة تخلص معاهم ورقه ولا تسالهم على حاجه وتمشي
تلاقيهم ما سبوهاش فى حالها
شوفى لبسها 
شوفى جزمتها 
شوفى مراخيرها 

اعوووووووووووذ بالله 
حاولت اول مابدات شغل معاهم اقولهم ماينفعش كده 
ولا كانى بتكلم 

بقيت اسكت او اسيبلهم المكان كله وامشي مهم مابيسكتوش 

بس بعد شويه بقيت احس انى امشي من هنا 
والكلام يشتغل عليا من هنا 

وبقيت احس ان عيونهم  ابر بتشكك فى ظهري وانا ماشيه 

والادهى بقى انهم المفروووووووووووض اقرب ناس ليا فى الشغل 
يعنى اصحاب 
لكن هو اللى فيه طبع هيسيبه ابدا ؟

مابقتش احب اروح اقعد معاهم 
ولا حتى اروح وقت البريك
لكن باجى على نفسي امال هفضل قاعده لوحدى طول النهار 

لكن النهارده 
قررت مش هروح اقعد فى وسطهم تانى خلاص 
ولا حتى هخرج فى اى حته معاهم 


انا يتريقو عليا ؟ ويضحكو قوى و  يقهقهو من الضحك على حاجه ماتضحكش اصلا ..لكن عايزة حد يستوعبها صح
طيب هما مابيفهموش ومخهم على قدهم وانا عارفه كده كويس قوى..مش تقليل من قيمتهم ولا تكبر عليهم ..لكن فعلا هما مابيشغلوش مخهم ابدا 

..وعشان كده رحت ماشيه وسيباهم 
عشان يعرفو يتريقو كويس ويجيبو فى سيرتى براحتهم 


انا لا احب حد يتريق عليا 
ولا بتريق ولا بغلط فى حد ابداااااااااااااااااااااا 

يبقى نبعد عنهم احسن حتى لو هبقى لوحدي 

Saturday, January 22, 2011

بنت المدير جات ...بنت المدير غاااااااااااارت

انا مالى اذا كان المدير بنته بتجيله الشغل ؟
هشتغلها بيبى سيتر ولا ايه ؟
اقعد اطبعلها فى رسومات وتقعد تلون فى مكتبى بمناسبه ايه بقى ؟

ده حتى بت بايخه ولا بتقول شكرا وللا لو سمحتى ولا اى حاجه 
ومع ذلك قلت ماشي وحاولت اعاملها كطفله ولو انى مابعرفش اتعامل مع العيال اللى معرفهاش 

ولكن عملت اللى عليا وقعدتها فى مكتبى قاعده ترغى وتتنطط وتشيل فى الاقلام وتحطها وتشخبط على الترابيزة
لحد ما ابوها جه خدها وريحنى 

كان عندى كلام كتير جدا عايزة اطرطشه فى وشه 
زى بنتك دى علمها تشكر الناس 
وخلى بنتك تعرف تتعامل مع الاكبر منها باسلوب احسن من كده 
وماتجبش بنتك عندى فى المكتب عشان ماتعطلنيش 

ولكن قلت لا مش قايله  الطيب احسن وكمان بنته الوحيده والناس كلها عماله تدلع فيها 
مهى بنت المدير بقى
وانا اللى اجى اقوله علم بنتك الادب 

فى نفس الوقت ييجى لسانى ينطق حاجه كويسه عن البنت 
ابدااااااااااااااااااا
اجى اعمل زى ما الباقى بيعمل وادلعها 
ابداااااااااااااااااااااا

وكأن بقى مقفول بالضبه والمفتاح 

و لا انا عايزة ادلعها 
وخايفه اجامل ابوها يفتكرنى بنافقه 
وكمان مش عايزة الكلام بينى وبينه يزيد عن المحدود 

عارفه ان جو الشغل بيفرض علينا بعض المجاملات 
وسبحان الله انا بعمل كده وبجامل بعض الرجاله الموظفين المحترمين فى الشغل 
ولو واحده ست هى اللى جايبه بنتها يمكن اجى على نفسى واجاملها واشكر فى بنتها وخلاص
   كمان بنته دى عندها 4 سنين بس
ناقصه انا عيال 
كان فاضل كمان تقولى عايزة اعمل بيبى

Wednesday, January 19, 2011

انا والمرتب وهواك

يعنى ايه لزمته بس كل الحوار ده 
وكانت ايه لازمتها الخناقه دى والزعل ؟

من كتر الكلام اللى دار ولف وطار واتخبط بينا 
نسيته معظمه

لكن هو سؤاااااااااااااااال وموجه للرجاله بالاساس 

مالك انت وماااااااااااااال مرتب مراتك؟
مراتك وقفت معاك فى وقت تسديد ديونك
وعمرها ما طلبت منك حاجه فوق طقتك ولا زياده على ميزانيه البيت 

تتكلم بقى فى اللى هتقبضه واللى هتشيله ليييييييييييييييييييه ؟

انت مااااااااااااااااااالك
.
.
.
.
انتى لسه بتسالى ؟
ماقلت مش هاممنى الفلوس انا كل همى اننا مايبقاش حاجه اسمها دى حاجتى ودى حاجتك او ده مرتبك وده مرتبى 
زى مانا عمرى ماحسيت انى بعمل حاجه لنفسى 

مش مصدقاك

انتى صدمتينى ...عمرى ماكنت افكر ان حياتنا تبقى كده 

انت اللى مش فاهمنى ..انا عايزة اشيل حاجه للزمن امان بعد كده 

انت خايفه منى ؟

لا انا خايفه من الزمن ومش عايزة امد ايدى لحد

انتى عايزه ايه دلوقتى ؟

مش عايزه حاجه غير انك ماتطلبش منى اى حاجه انا هدفع حضانه العيال وبس 

طيب ..ربنا يقدرنى واتقبل اللى بتقوليه ده 
.
.
.
ويسود صمت رهيييييييييييييب
وقررت انى مش هبقى شريرة وانى مش عايزه احس انى انا اللى ببوظ حياتنا 
.
.
.
خلاص بقى ايه رايك يبقى مرتبك ومرتبى مع بعض ونبقى احنا الاتنين عارفين نتصرف فيه ازاى ؟

يعنى ايه ؟

يعنى المرتبين يتحطو فى مكان معروف لينا احنا الاتنين ومافيش حاجه تتصرف غير لما نكون احنا الاتنين عارفين ..خلاص كده راضى ؟

اخيرا فهمتى قصدى ؟

طبعا (والله مانا عارفه ولا مطمنه بس ادينى توكلت على الله وخلاص )اه طبعا يا حبيبى فهمت هو انا اقدر ازعلك؟؟!!! عرفت انى مش عامله فرق بينا ولا حاجه؟


ايوة اكيد بس خلاص مالوش لازمه نعمل كدهو نوجع دماغنا مع الموظفين فى الشغل عشان تحويل المرتب..خلى مرتبك معاكى وان شاء الله مش هنحتاجه

ماشى يا حبيبى اللى تشوفه (ربنا يستر )يارب تكون راضي
.
.
.
تفتكرو انا اتصرفت صح ؟
تفتكرو هو كان كل همه انه مايحسش ان فى فرق بينا وانى ماكونش سبب فى عدم استقرار البيت ؟
ولا برضه بيفكر فى مرتبى ؟وهنصرف منه كام على البيت ؟؟؟؟؟؟؟؟؟

 

Saturday, January 15, 2011

متى ساتوقف عن الاحمرار خجلا؟


مش عارفه هى طقت فى دماغى كده 
ملاقيتش غيرها مطلع اطلع بيه فى اول كلامي 

وخصووووووووصا انه سؤال شاغلنى طول النهار بنفس الصيغه دى 
متى ستاوقف عن الاحمرار خجلا 

يعنى ينفع واحده كبيرة متجوزه ومخلفه وفى منصب مهم جدا زى اللى انا فيه ده 
ولما حد ييجى يكلمنى اقوم وشى يحمر ؟
يعنى مهو بيبان عليا فى ساعتها 
واحس ان فى دخان بيطلع من وداني 
وده يخلينى اتكسف زياده واحس انى عيله فى سنه اولى حضانه 

وبيبقى كلام عادي خالص 
لكن مش عارفه ليه انا كده 

انا كشخص عاقل وافكر شايفاها حاجه كويسه مش وحشه 
الرسول صلى الله عليه وسلم كان حيي

لكن فى ناااااااااااااس لو شافتنى وشى بيحمر كده وبتكسف ممكن يقولو بقى دى يتضحك عليها  بسرعه
او دى سازجه 
او قد ايييييييييييه انا مؤثر وبخلى وشها يحمر 

او يعنى مثلا يجيلي الزبون يسالنى على حاجه
وشى يحمر يقول دى خايبه ومش عارفه حاجه ولا فاهمة حاجه وبتضرب لخمه ؟

مع انى والله مع كل الناس كده 
رجاله وستات 
لو حسيت ان اللى قدامى مركز فى كلامي 
يتقلب وشي لطمطمايه  واعصر دماغي على ماجمع الكلام تانى

قولولى اعمل اييييييييه 
اعمل اييييييييييييييييييييه ؟


ينفع كده ؟

Wednesday, January 12, 2011

اول مكالمة تليفون



ايه ده ؟
التليفون بيرن ؟
مش معقول حد عرف نمرتي فى المكتب ؟
يكون جوزى؟
لا مش نمرته
طيب مين ده ؟
دى نمرة موبايل
؟؟؟؟؟؟؟؟؟؟
هرد وخلاص

الو ..مين ؟
ممكن اكلم فلان الفلانى
طيب ثانيه واحدة

اعمل ايه ؟ اعمل ايه ؟
مين اللى هو عايزه ده ؟

ايوة يا دعاء (دعاء دى تبقى زميلتى فى الشغل وبتساعدنى كتير ) فاضيه ولا مشغوله؟
ايوة خير ؟
فى واحد اتصل وعايز فلان الفلانى 
مين ده ؟
انتى بتسالينى ؟ انتى مش بقالك هنا سنه ؟ يكون مين ده اللى هو عايزه  ولا نمرة غلط ؟
لا لا حوليه على الاستقبال وهما يتصرفوا معاه 
طيب شكرا  سلام
ايوة معلش ثانيه واحده هحولك على الاستقبال 
.
.
.
.
ردوووووووووو بقى 
اه صح عرفته 

ايوة معلش معاك ورقه وقلم
ايوة 
اتفضل نمرته اهى 
شكرا
العفو 

يا فرحه ماتمت 
فى الاخر طلع فى غلط بسيط بين نمرتى ونمرة الموظف التانى

بس اهو برضه حاجه كويسه 
تليفونى طلع عايش وممكن حد يتصل بيا عليه
لا ونجحت فى انى اخدم الراجل واوصله للموظف المطلوب

يمكن فى يوم من الايام يبقالى مكان مهم فى المؤسسه 
والناس تتصل عليا 
وانا اقول يووووووووووه مش فايضه ارد على تليفونات حد 

واطنش شويه 
وممكن برضه ابقى متضايقه من موظف تانى اقوم محولاله هو المكالمات 
او ح ييجى يكلمنى فى المكتب اعمل نفسى معايا تليفون 

هعهعهعهعهعهعهع 
شريرة انا 
بس هى فين المكالمات 
:(



Sunday, January 9, 2011

وبدات التفكير

مش عارفه انا صح ولا غلط 
ولا يمكن انا اللى مكبرة الموضوع 

انا زى ما قلتلكم بدات التدريب وانا مش عارفه انا هشتغل فى اى قسم بالظبط فى المؤسسة 
ولكن لانى زى اى حد محتاجه الشغل طبعا اول ماربنا كرمنى بيه وافقت 
قعدت حوالى  اسبوع فى مكتب موظفه تانيه بفهم منها طبيعه سير العمل فى المؤسسة
وكنت فى شده الاستعجال انى اقعد على مكتبى واعرف راسى من رجلى فى الشغل 

وفعلا بقى ليا مكتب 
وحسيت انه بفضل الله مكانه مميز لان كل الانظار كانت واضح عليها اعجابها بالمكان وبالمكتب 
وبعض النظرات كانت يمكن بتتمنى المكان ده 
وبدات كى جى وان شغل

وطبعا خطوة خطوة بتعلمها 
وبفهم طبيعه مديري

واول ما حسيت انى مستمتعه بالمكان والشغل 
فوجئت انى هبقى سكرتيرة المدير 
!!!!!!!!!!!!!!!!!!!!!!!!!!!!!!
وانى اخر واحده مش مصدقه ومش عايزة اقنع نفسى بكده
رغم ان الكل فاهم انى سكرتيرة 

وطلع المنصب ده جديد فى المؤسسة
وان الشغل زاد فحتاجو حد يساعد وينظم الشغل للمدير 
اللى هو فى الاخر سكرتير

واسبهليت 
وحزنت
بعد التعليم ده كله ابقى سكرتيرة ؟
بعد شهادتى دى اشتغل سكرتيرة ؟

طيب هو كده كويس ولا وحش؟
طيب وهما بقيت السكرتاريه منصبهم وحش؟
ابدا ده الكل بيحترمهم 

طيب هو انا كده افضل من اى موظف ولا انا فى نفس مستواه ؟
هما اهم ولا انا ؟

واستشرت ناس 
قالولى مش مهم منصبك ايه 
المهم انك تثبتى نفسك فى شغلك وتنجحى 

لان ممكن يكون مدير ومش مالى مركزه
وممكن يكون سكرتير لكن كل المؤسسة عارفه ان مافيش حاجه هتمشى غير بعد رايه ومشورته 

حسيت باهمية مكانى 

وفكرت بطريقه جديده 

وبدات ادور ازاى انجح فى شغلى 

وبعد ما كنت بفكر اسيب الشغل
قررت انى اتمسك بيه اكتر واثبت مكانى فى مكتبى
بدون اى خجل 
وبكل ثقه فى نفسى

قلت انا سكرتيرة المدير

قلت انا السكرتيرة الجديدة

وعدى تانى اسبوع على خير  

Saturday, January 8, 2011

موظفة جديدة ..ياترى دى ميييييين؟


من اول يوم تدريب 
كانت نظراتهم بتضايقنى فى الاول 

فى كل مكان اروحه وكل مكتب ادخله 
النظرات بتحاصرنى

وان كان بعضهم كانت نظراته عاديه او الى حد ما نظراته لطيفه وودوده
وخصوصا بعض الموظفات 
ولكن كان فى كام موظفه كده مارتحتلهمش من اول لقاء 
ومعرفش ليه 
لكن تاكدلى بعد كده ان احساسي كان فى محله 
وهبقى اقولكم عليهم بعدين 



لكن بشكل العام المكان شكله كويس
متدربه جديده مش عارفه هشتغل فى ايه لسه 
لسه فى ورق بخلصه 
وبتعرف على الموظفين والموظفات 
اول مرة اسيب ابنى لمده 8 ساعات متواصله 


اول مرة اسيب بيتى 

كنت عامله حسابى على غدا النهارده مش مشكله لو اتاخرت شويه فى الشغل او فى الطريق 

بشكل عام 
عدى اول اسبوع على خيييييييييييييييير